Яндекс.Метрика караткевіч Archives - Магілёўскі Рэгіён

Дыктоўка да Міжнароднага дня роднай мовы прайшла ў Магілёве

Больш за 70 чалавек прынялі ўдзел у традыцыйнай дыктоўцы, прымеркаванай да Міжнароднага дня роднай мовы, якая прайшла ў магілёўскім Палацы вобласці.

Дыктоўка праходзіць ужо ў трынаццаты раз, адзначыў напачатку мерапрыемства старшыня Магілёўскай гарадской арганізацыі Таварыства беларускай мовы (ТБМ) Алег Дзьячкоў. Кожна раз арганізатары выбіраюць ўрыўкі з твораў тых пісьменнікаў, якія звязаныя з Маглёўшчынай. Так, у 2019 годзе ўдзельнікі дыктоўкі пісалі на слых частку твора «Шчаслівае месца» Івана Чыгрынава, а сёлета – «Сівая легенда» Уладзіміра Караткевіча. Чытаў урывак настаўнік з 41-й школы Алесь Цітоў.

Пасля дыктоўкі ўсе жалаючыя маглі паглядзець спектакль на беларускай мове «Беларускі каляндар», наладжаны адміністрацыяй Палаца культуры.

«За гэтыя 13 гадоў змянілася ў значна лепшы бок стаўленне ўладаў магілёўскіх, чыноўнікаў да дыктоўкі. Прасцей стала арганізоўваць, яны самі прапануюць дапамогу. І тое, што яна праходзіць на прыстойным узроўні гэта, перадусім, дзякуючы нашым уладам, адміністрацыі і супрацоўнікам Палаца культуры вобласці», – заявіў «Магілёўскаму рэгіёну» Алег Дзьячкоў.

Паводле яго, раней многае рабілася выключна на энтузіязме актывістаў ТБМ і супрацоўнікаў палаца. «Зараз ёсць зацікаўленасць уладаў у тым, каб такія мерапрыемствы праходзілі», – упэўнены старшыня гарадской арганізацыі ТБМ.

Ён адзначае, што колькасць удзельнікаў дыктоўкі вагаецца ад 70 да 150 чалавек. Арганізатары не робяць шырокую рэкламную кампанію, арыентуючыся прыкладна на сотню ўдзельнікаў. Павялічыць іх колькасць ці ўвесці папярэднюю рэгістрацыю з пашырэннем рэкламы акцыі пакуль не плануецца. «Мы не ўводзім рэгістраыю, каб не было залішняй бюракратызацыі. Бо многіх гэта ўсё ж такі пужае, і многія з-за гэтага адмаўляюцца, напрыклад, людзі старэйшага ўзросту, якія не ўмеюць карыстацца інтэрнэтам і для якіх гэта праблема. А большая частка гэта ўсё ж такі людзі сталага ўзросту, якія не карыстаюцца інтэрнэтам. Але ёсць ядро – пару дзясяткаў чалавек, якія прыходзяць з года ў год. А многія паспрабавалі раз, два, а потым прыходзяць новыя людзі. Добрую палову людзей, якія сёння прыйшлі, я не ведаю», – кажа Дзьячкоў.

Паводле яго, дыктоўка спрыяе ўсведамленню, што «мы беларусы, што наша роўдная мова беларуская». Галоўны ж сэнс акцыі не ў граматычна бездакорным напісанні тэкста, а ва ўдзеле ў ёй.

Уладзімір Лапцэвіч

Фота Алесь Сабалеўскі

Праз памылку чыноўнікаў высяляюць цэлы дом (відэа)

Іхнае жытло назвалі інтэрнатам і цяпер іх высяляюць. У Магілёве судовыя выканаўцы сёння забралі ключы ад апошняй кватэры нібыта аварыйнага дому, які перайшоў ва ўласнасць будаўнічага трэсту. Жыхары некалькі гадоў змагаліся супраць незаконнага высялення, але чыноўнікі не прынялі да ўвагі іхныя доказы.

 

«У мяне было 2 сардэчных прыступы за ноч, бо 40 год тут пражылі, а нас выкідваюць на вуліцу», – скардзіцца мясцовая жыхарка.

Судовыя выканаўцы працягваюць высяленне жыхароў дому № 29 на вуліцы Заслонава ў Магілёве. Дом перабывае ва ўласнасці магілёўскага аблвыканкаму, але перададзены на баланс арганізацыі Будаўнічы трэст № 12. Людзей высяляюць на падставе некалькіх прычынаў. Па-першае, яны не маюць працоўную сувязь з наймальнікам. Па-другое, дом нібыта ў аварыйным стане.

«Ёсць рашэнне суда ад 2016-га году і выканаўчы ліст, які выконваюць супрацоўнікі прымусовага выканання. Увогуле першапачаткова дом быў прызнаны аварыйным. Усім прапанаваліся пакоі ў інтэрнаце ў розных кутках гораду. Усіх, хто не выселіўся, пачалі высяляць прымусова», – зазначыў Арцём Караткевіч, прадстаўнік будтрэсту № 2.

40 гадоў таму сяліліся ў «кватэру», апынулася, што ў інтэрнат

Уладальнікі памяшканняў сведчаць, што маюць ордары. Паводле іх, у 2002 годзе дом стаў інтэрнатам без ведама жыхароў. Аплочвалі камуналку яны за кватэры і толькі ў 2015 годзе даведаліся, што жывуць у інтэрнаце. Было пройдзена шмат інстанцыяў, судоў, былі нават звароты да кіраўніка краіны – нічога не дапамагло.

«Людзі прадставілі ўсе дакументы, якія пацвярджаюць, што гэта шматкватэрны дом, і яны жывуць у кватэрах. Аднак улады наплявалі на гэта, бо не хочуць прыцягваць да адказнасці чыноўнікаў, якія дапусцілі памылку. Яны проста не хочуць гэта прызнаваць», – тлумачыць праваабаронца Барыс Бухель.

Людзям наўзамен не даюць кватэраў

Прапаноўваюць толькі пакоі ў інтэрнатах. Каб не застацца зусім без даху над галавою, большасць жыхароў пайшла на такі крок.

Марыя Бабакова ўжо перавезла рэчы ў інтэрнат. Жанчына скардзіцца, што ёй пагоршылі ўмовы, скараціўшы метраж жылля.

«Кватэра мая была 19,3 кв. метры. Зараз мяне перасялілі ў пакой інтэрната. Плошча гэтага пакою 12,7 кв. метраў. У параўнанні з той яна значна меншая», – скардзіцца Марыя.

Галоўнае нараканне «навасёлаў»

Дамова на інтэрнат заключаная з жыхарамі толькі на 5 гадоў. Што будзе па сканчэнні гэтага тэрміну, не вядома. Чыноўнікі запэўніваюць, што дамову кожныя 5 гадоў будуць працягваць і нікога на двор не выкінуць. Пасля трохгадовых спрэчак ды судоў, даверу да іхных словаў «перасяленцы» не маюць.

Міхась Ільін, «Белсат»